Ciné-conférence: Cinema da retomada

De brasilianesche Kino vun haut gehéiert, zesumme mat deem vun anere latäinamerikanesche Länner wéi Mexiko an Argentinien, zu deene kreatiivsten a spannendste Filmindustrië weltwäit –  mat Filmproduktiounen, déi souwuel um nationale wéi internationale Plang grouss Succèse ginn a sëllege Präisser gewannen. Dat war awer net ëmmer sou: No der Opléisung vun de staatleche Filmproduktiouns- a Fërderinstitutiounen Embrafilme a Cocine am Joer 1990 war déi brasilianesch Filmindustrie zäitweis an eng déif Kris geroden. De Retour – oder d’Retomada – vum brasilianesche Kino Mëtt den 90er-Joren huet coïncidéiert mat neien demokrateschen Ambitiounen an enger Relance vun der Ekonomie. Filmer wéi Central do Brasil (1998, Walter Salles), Cidade de Deus (2002, Fernando Meirelles, Kátia Lund) an Tropa de Elite (2007, José Padilha) hunn och international vun sech schwätze gedoen, an hunn dem brasilianesche Kino nees zu neier Gréisst an Unerkennung verhollef. Thematesch an ästheetesch hunn dës Produktiounen sech um Cinema Novo vun de 50er- a 60er-Joren inspiréiert. Niewent de Lieue wéi de Favelae vun deene grousse Stied an dem Sertão (dat aarmt Hannerland am Nordoste vu Brasilien) goufen och d’Theeme wéi déi sozial a politesche Gewalt, Korruptioun a staatlechen Institutiounen souwéi ganz allgemeng déi sech verännerend Welt opgegraff a moderniséiert.

D’Ciné-conférence retracéiert d’Entwécklung vum brasilianesche Kino säit 1990 an illustréiert se mat Hëllef vun Extraiten aus deene wichtegste Filmproduktiounen.

Durée : ca. 120 Min.

Sprooch : Lëtzebuergesch

Fräien Entrée, ouni Réservatioun